செவ்வாய்க்கிழமை, 28 ஜனவரி 2014 11:49

விடையே இல்லாத வினாக்களா இவை?

Rate this item
(0 votes)

 அளவற்ற அருளாளன் நிகரற்ற அன்பாளன் அல்லாஹ்வின் பெயரால்...

 

விடையே இல்லாத வினாக்களா இவை?

பேரன்புடையீர் அஸ்ஸலாமு அலைக்கும் வரஹ்........

ஹிஜ்ரி 1433 ஆண்டின் ரமழான் மாதம் நம்மிடமிருந்து விடை பெற்றுவிட்டது.வழக்கம்போல மக்கள் தங்களின் அலுவல்களில் மூழ்கி விட்டார்கள். இனி பிறை குறித்துப் பேசுவதற்கோ சிந்திப்பதற்கோ நம் சமூகத்தில் நாதியிருக்காது. அடுத்த பெருநாள், அல்லது ஷஅபான் இறுதியில்தான் பிறை என்று ஒன்று உள்ளது என்பதே மக்களின் நினைவுக்கு வரும்.

வழக்கம்போல கடந்த ஷவ்வால் 2 ஞாயிறு அன்றும் (19.08.2012), ஷவ்வால் 3 திங்கள் அன்றும் (20.08.2012) மக்ரிபு வேளையில் தென்பட்ட மறையும் பிறையை பார்த்துவிட்டு அடடே ரமழானில் நாம் இத்தனை நோன்பை விட்டுவிட்டோம், பெருநாளை தவறான தினத்தில் அல்லவா கொண்டாடிவிட்டோம் என்று மக்களில் பலர் இவ்வாண்டும் கைசேதப்பட்டதை நம்மால் காணமுடிந்தது.

ஹிஜ்ரி கமிட்டி மூலம் ரமழான் மற்றும் பெருநாள் அறிவிப்புகளை தமிழகத்தின் பல ஊர்களிலும் இவ்வாண்டும் நாம் செய்திருந்தோம். அல்லாஹ்வின் பெரும் கிருபையால் தமிழகத்தில்  பல்லாயிரக்கணக்கான முஸ்லிம் சகோதர சகோதரிகள் கடந்த சனிக்கிழமையன்று சரியான நாளில் (18.08.2012) ஈகைத்திருநாளை கொண்டாடி வல்ல அல்லாஹ்வின் பிறை சான்றுகளுக்கு சாட்சி பகர்ந்தனர்; அல்ஹம்துலில்லாஹ்.

இறைவன் நமக்களித்துள்ள மனிதகுலத்தின் காலண்டரான பிறைகளின் படித்தரங்களை துள்ளியமாகக் கணக்கிட்டு ஹிஜ்ரி கமிட்டியினரால் வெளியிடப்பட்டுள்ள நாட்காட்டியின் தேதிகள் மிகச்சரியானது என்பதை பிறைகளை தொடர்ந்து பார்த்து வருபவர்கள் நன்கு அறிவர்.

ஹிஜ்ரி கமிட்டியின் பிறை அறிவிப்புகள் மிகத்துள்ளியமானது என்பதற்கும், கடந்த சனிக்கிழமை (18.08.2012) அன்றுதான் ஷவ்வால் 1 என்பதை நிரூபிக்கும் வகையிலும், வெள்ளிக்கிழமை (24.08.2012) அன்று சூரியன் மறையும் நேரம் பிறை அரைவட்ட வடிவமாகி இம்மாதத்தின் 7வது நாளை உலக மக்கள் அனைவருக்கும் அறிவிக்கும்.

மேலும் எதிர்வரும் வெள்ளிக்கிழமை 31.08.2012 அன்று ஷவ்வால் மாதத்தின் 14வது நாள் முழுநிலவு நாள் என்னும் பவுர்ணமி தினம் ஆகும். இவ்வருடத்தின் ஷவ்வால் மாதத்திற்கு புறக்கண்ணால் பார்க்கவியலும் பிறைகளின் 29 படித்தரங்களோடு 30வது நாள் அம்மாவாசை சேர்த்து 30 நாட்களை வல்ல அல்லாஹ் ஏற்படுத்தியுள்ளான். வரும் ஞாயிற்றுக்கிழமை (16.09.2012) அன்று ஷவ்வால் 30 தினங்களில் பூர்த்தியடைகிறது.

சந்திரனின் படித்தரங்களில் ஒரு நாள் 100 சதவீதம் சந்திரனில் ஒளி ஏற்பட்டு, முழு  நிலவு ஏற்படும். அந்த நாள் 13வது தினத்தில் ஏற்படுவது மிகவும் சொற்பமாகவே ஏற்படும் என்பதை அனைவரும் அறிவோம். பதிமூன்றாவது நாள் முழு நிலவு நாளாக வருவதே அபூர்வமாக இருக்கும் நிலையில், இதைவிடக் கொடுமையான விஷயம் என்னவென்றால், மணிக்கணக்கில் சந்திரனை கண்களால் பார்த்தபிறகு, கடந்த திங்கட்கிழமை (20.08.2012) பெருநாள் கொண்டாடியவர்களுக்கு இந்த முழுநிலவு நாள் என்னும் பவுர்ணமி தினம் அவர்களின் கணக்குபடி 12வது நாளில் வருகிறது. 

உலக வரலாற்றில் முழுநிலவு நாள் என்னும் பவுர்ணமி தினம் யாருக்காவது 12-வது  தினத்தில் ஏற்படுமா? மக்களே! சிந்தியுங்கள்! பிறையை புறக்கண்ணால் மட்டும்தான் பார்ப்போம் என தொடர்ந்து பிடிவாதமாக உள்ள அன்பர்களிடம் நீங்கள் பிறைகளை சரியாகக் கணக்கிடுங்கள்! பிறைகளின் அனைத்து படித்தரங்களையும் பார்த்து வாருங்கள்! சர்வதேசம் சவுதிதேசப்பிறை என மக்களை பிளவுபடுத்தி குழப்பாதீர்கள் என குர்ஆன் சுன்னா ஒளியில் நாம் அவர்களுக்கு உபதேசிக்கும் வேளையில் நம்மிடம் முகம் சுளிப்பதைத் தவிர வேறென்ன பதிலை அவர்கள் நமக்கு இதுவரை சொல்லியிருக்கிறார்கள்.

ஆண்டுகளின் எண்ணிக்கையை குர்ஆன் சுன்னா கூறுவதைப்போல கணக்கிட்டு, இஸ்லாமிய நாட்காட்டியை அல்லாஹ் நமக்கருளிய அறிவின் அடிப்படையில் முஸ்லிம்களால் தர இயலாதா? அவ்வாறு குர்ஆன் கூறும் பிறையின் அஹில்லாக்களையும் மனாஜில்களையும் கணக்கிட்டு நாட்காட்டி வெளியிடுவது ஏதும் குற்றமா? அல்லது அந்நாட்காட்டியை பின்பற்றுவது ஹராமா? மக்களே! சற்று சிந்தியுங்கள்!

மேலும் சர்வதேசப்பிறை போர்வையில் சவுதிதேசப்பிறைக்குள் தஞ்சமடைந்து விட்ட தவ்ஹீது இயக்கத்தின் சறுக்கல்களை தமிழக மக்களுக்கு பிரசுரங்கள் மூலம் நாம் வெளிச்சம் போட்டு காண்பித்ததால் மேற்படி மதனிகளின் இயக்கமும் அவர்களை கண்மூடித்தனமாகப் பின்பற்றி இயக்கம் நடத்தும் நிர்வாகிகளும், ரமழான் என்றும் பாராமல் ஹிஜ்ரி கமிட்டியினர் மீது கட்டவிழ்த்துவிட்ட அவதூறு பிரச்சாரங்களையும், வன்முறைகளையும் கனத்த மனதோடு நாம் நினைத்துப் பார்க்கிறோம்.

எந்த அளவிற்கு என்றால் சவுதிஅரேபியாவின் தாயிஃப் நகரில் பார்த்த பிறையை ஹிஜ்ரி கமிட்டி நிராகரிக்கிறது அதனால் ஹிஜ்ரி கமிட்டியினருக்கு ஈமானில் குறைபாடு என்றார் ஒருவர். எப்படிபட்ட அவதூறு இது? தாயிஃப் நகரில் யார் பிறைபார்த்தார்? அதை எப்போது இவர்கள் அறிவித்தார்கள்? அதை ஹிஜ்ரி கமிட்டியினர் எப்போது மறுத்தார்கள்? இதற்கு ஏதாவது ஆதாரம் ஒன்றையாவது காட்ட முடியமா? ஹிஜ்ரி கமிட்டியினரின் நெஞ்சத்தை பிளந்து பார்த்துவிட்டுதான் ஈமானில் குறைபாடு என்ற அவதூறை இந்த மவ்லவிகள் அள்ளிவீசினார்களா? அல்லாஹூ அக்பர்.

அரண்டவனுக்கு இருண்டதெல்லாம் பேய் என்பார்களே, அதுபோல நாங்கள் சர்வதேசப் பிறையினர் என முழங்கிக் கொண்டு சைனா பிறையை அங்கீகரிக்க மாட்டோம் என சீன தேசத்துப் பிறையை ஹராமாக்கிய கூத்துக்களெல்லாம் இந்த ரமழானின்தான் நடந்தேறியது.

இதற்கும் ஒருபடி மேலே போய் மேற்படி இயக்கத்தினர் ஹிஜ்ரிகமிட்டியினர் பதிவுசெய்த தொழுகைத் திடலில் அவர்களைத் தொழவிடாமல் மிரட்டி இடத்தை அபகரித்ததோடு மட்டுமின்றி ஹிஜ்ரி கமிட்டியினர் மீது அடியாட்களை ஏவிவிட்டு பதட்டத்தை ஏற்படுத்தி போலீஸ் வழக்கு என்றும் இழுத்துவிட்டனர். இதுதான் இஸ்லாமிய பிரச்சாரகர்களின் இலட்சமா? இதுதான் தவ்ஹீது தந்த பாடமா? அவர்கள் ஏன் சிந்திப்பதில்லையோ? நடந்தவை நடந்தவையாக இருக்கட்டும் இனி நடப்பவை நன்மைதரும் நல்லவையாக இருக்கட்டும் என்றே ஹிஜ்ரி கமிட்டி விரும்புகிறது.

எங்கள் மீது குஃப்ர் ஃபத்வாக்களையும் அவதூறுருகளையும், சேற்றையும் வாரியிறைத்தவர்களை நாங்கள் மறக்கிறோம்; மன்னிக்கிறோம். சத்தியத்தை அறியமுற்படாமல் எங்களை கண்மூடித்தனமாக எதிர்க்கும் அவர்களுக்கு எங்கள் அன்பை பரிசாக்குகிறோம். அத்தகைய சகோதரர்களின் கண்ணியத்தையும் மானத்தையும் நாங்கள் புனிதமாகக் கருதுகிறோம். காரணம் இறைவன் வரையறுத்துவிட்ட நாள்களை முன்பின் ஆக்குவது இறைமறுப்பில் கொண்டு சேர்க்கும் என்ற இறைவனின் எச்சரிக்கையில் நாம் மிகவும் கவனமாக இருக்கிறோம். எனவேதான் இவ்வுலகில் எந்தவித பிரதிபலனையும் பாராமல் பலசோதனைகளுக்கும் எதிர்ப்புகளுக்கும் மத்தியில் ஹிஜ்ரி கமிட்டியினர் செயல்பட்டுக் கொண்டிருக்கிறார்கள் என்பதை அன்போடு நினைவுபடுத்துகிறோம்.

ஸூமூ லி ருஃயத்திஹி - பிறையைப் பார்த்து நோன்பு வையுங்கள், அல்லது பிறையை புறக்கண்ணால் பார்த்துதான் அமல் செய்ய வேண்டும் என்று மார்க்கத்தின் பெயரால் மக்களுக்கு போதிப்பவர்களை நோக்கி கீழ்க்கானும் கேள்விகளை கண்ணியத்தோடு வைக்கிறோம். இவற்றிற்கு வளைக்காமல் திரிக்காமல் குர்ஆன் சுன்னா அடிப்படையில் தயவுசெய்து பதில் தாருங்கள் என அன்போடு கேட்கிறோம்.

  1.  இறைத்தூதர்(ஸல்) தம்முடைய வாழ்நாளில் என்றாவது ரமழான் அல்லது பெருநாள் பிறையை தம் புறக்கண்ணால் பார்த்து அறிவித்தார்களா? யாரேனும் பிறையை பார்த்தால் அதை என்னிடம் வந்து அறிவித்தே ஆகவேண்டும் என என்றாவது கூறினார்களா? இதற்காக டவுண்காஜிகளையோ, பிறைக் கமிட்டியினரையோ நியமித்தார்களா?
  2. எந்தத் திசையில், எந்த வேளையில், எந்தெந்த நாள்களில் பிறையை பார்க்க நபி(ஸல்) நமக்கு கட்டளையிட்டுள்ளார்கள்? பிறைகளின் படித்தரங்கள் குறித்து (10:5, 36:39) அல்லாஹ்வின் அறிவுப்புகளை, கட்டளைகளை அவர்கள் எப்படி புரிந்து நடைமுறைப் படுத்தினார்கள்?
  3. வளர்பிறை, தேய்பிறை, முழுநிலவு, சந்திரன் மறைக்கபடும் நாள் என அனைத்தையும் நபி(ஸல்) புறக்கண்ணால் பார்த்து வந்தார்களா? அவர்கள் தினமும் பிறையை அவதானித்தார்களா அல்லது மாதத்தின் 29வது நாள் மட்டும்தான் பிறையைப் பார்த்தார்களா? இதற்கான ஆதாரம் எங்கே?
  4. ஷஅபான் 29 மற்றும் ரமழான் 29 தினங்கள் என்று நினைத்துக் கொண்டு அன்று மக்ரிபு வேளையில் மேற்கு திசையை நோக்கி நின்று கொண்டு பிறையைப் பார்ப்பதை கற்றுக் கொடுத்தது யார்? அன்று 29வது நாள்தான் என்ற முடிவிற்கு நீங்கள் எப்படி வந்தீர்கள்? மாதத்தின் 28, 27, 26 போன்ற நாள்களிலும் பிறை மேற்கு திசையில் மக்ரிபு வேளையில்தான் தெரிகிறதா?
  5. ஸூமூ லி ருஃயத்திஹி பிறையைப் பார்த்து நோன்பு வையுங்கள் என மேடையில் முழங்கும் எந்த ஆலிமும் பிறையை தம் புறக்கண்ணால் பார்த்துவருவதில்லை என்பதை எங்களால் அடித்துக் கூறமுடியும். இத்தகையோரின் தவறான பிரச்சாரத்தினால்தான் மூன்று வெவ்வேறான நாள்களில் பெருநாள் உட்பட முஸ்லிம்களுக்கு ஒரு கிழமைக்கு 3 தேதிகள் மற்றும் மூன்று கிழமைக்கு ஒரு தேதியும் வருகிறது. இவ்வாறுதான் குர்ஆன் சுன்னா போதிக்கிறதா? மூன்று தேதிகள் ஒரு கிழமைக்கு என நீங்கள் ஏற்படுத்தியிருக்கும் இந்த முறைக்கு ஆதாரம்தான் என்ன? தலைப்பிறையை சரியாக கணக்கிடாமல் அல்லது பிறையைப் பார்க்காமல் நீங்கள் இருந்துவிட்டால் சம்பந்தப்பட்ட அந்த மாதம் துவங்காமல் போய்விடுமா என்ன? சற்றே சிந்தியுங்கள்!
  6. உங்கள் கருத்துப்படியே பிறையை புறக்கண்ணால் பார்த்துதான் நோன்பை ஆரம்பிக்க வேண்டும் அவ்வாறுதான் பெருநாள் தொழுகை தொழவேண்டும் என்றால், ஆறு மாதங்கள் பகலாகவும், ஆறு மாதங்கள் இரவாகவும் இருக்கும் துருவப்பிரதேசத்தில் வசிக்கும் முஸ்லிம்களின் நிலைதான் என்ன? ஆறு மாத பகல்காலங்களில் ரமழான் மாதம் வரும் பட்சத்தில் அவர்கள் அந்த ஆறு மாதங்களும் பட்டினி கிடக்கவேண்டுமா? அல்லது அந்த ரமழான் முழுவதும் பிறை கண்களுக்குத் தெரியவில்லை என்பதால் அம்மக்களுக்கு நோன்பே கடமையில்லையா? பக்கத்து நாடுகளை வைத்து கணக்கிட்டுக் கொள்ளலாம்; இதற்கு தஜ்ஜால் வரும் காலத்தில் நிகழும் நாள்களைப் போல கணக்கிட்டுக் கொள்ளலாம்; இதற்கு ஹதீஸில் ஆதாரம் இருக்கிறது என நழுவாமல் பிறையை புறக்கண்ணால் பார்க்கவேண்டும் என்ற உங்கள் சட்டவிதியின் அடிப்படையில் பதில் தாருங்கள்!
  7. ஒரு வருடத்தின் 12 மாதங்களில் ரமழான், ஷவ்வால், துல்ஹஜ் மாதங்களில் மட்டுமே பிறையை தேடி அலையும் படலத்தை நடத்துகிறீர்களே;  ஏனைய 9 மாதங்களிலும் பிறையை ஒருபொருட்டாகவே நீங்கள் கருதுவதில்லை அல்லது கலண்டரைத்தான் பின்பற்றுகிறீர்கள்; இவ்வாறுதான் நபி(ஸல்) ரமழான், ஷவ்வால், துல்ஹஜ் ஆகிய மூன்று மாதங்கள் மட்டுமே பார்த்தார்களா? அல்லது ஒவ்வொரு மாதமும் பிறையை புறக்கண்ணால் பார்த்தார்களா? இதில் மார்க்கம் நமக்கு கற்றுத் தருவது என்ன?
  8. விஞ்ஞானத்தின் துணைகொண்டு துள்ளிய கணக்கீட்டின் அடிப்படையில் பிறை தெரியாத கும்மா உடைய நாள், தலைப்பிறை போன்றவற்றை அறிவிக்கும்போது நாங்கள் என்ன சொல்கிறோம் என்பதைக்கூட விளங்க முற்படாமல், நபி(ஸல்) பிறையை கண்ணால்தான் பார்க்க சொன்னார்கள் என்று தவறாக கூறி அறிவியலை அலட்சியப் படுத்துகிறீர்களே, தலைப்பிறையை ஒருவர் இரவு 10 மணிக்கு பார்த்ததாகவோ, நன்பகல் வேளையிலேயே பார்த்ததாகவோ அறிவித்தால் அதை ஏற்றுக் கொள்வீர்களா? அல்லது அதை மறுப்பீர்களா? விஞ்ஞானத்தின் துணையின்றி அப்பிறை அறிவிப்பை நீங்கள் எப்படி ஏற்றுக்கொள்வீர்கள்? அல்லது எப்படி மறுப்பீர்கள்?
  9. தலைப்பிறை புறக்கண்ணால் பார்க்கப்பட்டதாக வரும் தகவலை மாநில, தேசிய அல்லது சர்வதேச எல்லைக் கோட்டை வைத்து வரையறுக்க ஆதாரம் என்ன? அத்தகைய எல்லை கோட்டிற்கு மார்க்கம் தரும் முக்கியத்துவம்தான் என்ன? அவ்வாறு மாநில, தேசிய அல்லது சர்வதேசத் தகவலை வைத்து ரமழான் அல்லது பெருநாள் என்று அறிவிப்பு வெளியிடுபவர்கள் சாட்சி விஷயத்தில் நபி(ஸல்) நடைமுறைபடுத்திய இறை நம்பிக்கையாளர்களின் இரண்டு சாட்சிகளை முன்னிறுத்திதான் அறிவிக்கிறீர்களா? அல்லது இனம்காணாத நபர்களின் அறிவிப்புகளை ஏற்றுக்கொண்டு அறிவிக்கிறீர்களா? அப்பிறை அறிவிப்புக்கு சாட்சியளித்தவர்கள் குறித்து முறையாக அறிவிப்பு ஏன் செய்யப்படுவதில்லை? அவர்களின் சாட்சியத்தை உறுதிப் படுத்தும் நடவடிக்கைகளில் சம்பந்தப்பட்டவர்கள் உண்மையிலேயே அக்கரை எடுக்கிறார்களா?
  10.  பிறையை புறக்கண்ணால் பார்த்துதான் ரமழான் மாதத்தைத் துவங்குவோம் என்று மார்தட்டுபவர்களே! உங்கள் இயக்கங்கள், அமைப்புகள் ஒவ்வொரு மாதத்திற்கும் முன்கூட்டியே காலண்டர் அச்சிட்டு வினியோகம் செய்வது ஏன்? இதுமட்டும் நபி வழிக்கு முரணாக இல்லையா?

இப்படி பல்வேறு கேள்விகளை நாம் கேட்டுக் கொண்டுதான் இருக்கிறோம். இக்கேள்விகளை நாம் கேட்பது சம்பந்தப்பட்டவர்களின் அறியாமையை வெளிக்கொண்டுவருவதற்கு அல்ல மாறாக அவர்கள் சிந்திப்பதற்காக! இன்னும் நம்மில் பலர் ஹிஜ்ரி கமிட்டி பெருநாள் என்று அறிவிப்பதை ஏற்றுக் கொள்கின்றனர் அதை சரிகாண்கின்றனர்.

அதேவேளையில் சில அறிஞர்களின் நிர்பந்தத்தினாலும், தவறான வழிகாட்டுதலினாலும் அன்று நோன்பு நோற்காமல் இருந்துவிட்டு பெருநாளும் கொண்டாடாமல் இருந்துவிட்டு ஊர் தலைவர்களுக்கோ, இயக்க தலைவர்களுக்கோ பயந்து பெருநாள் தொழுவதற்கு விடுப்பு எடுத்துக் கொள்கின்றனர். பின்னர் தாம் சார்ந்த இயக்கம், அமைப்பு அல்லது ஜமாஅத் என்றைக்கு பெருநாள் தொழுகை நடத்துகின்றனரோ அன்றைய தேதியில் தொழுகையில் கலந்து கொள்கின்றனர். என்ன நியாயம் இது?

அல்லாஹ்வை திருப்படுத்த சரியான நாளில் பெருநாளை கொண்டாடுவதில் தவறிவிடுவார்களாம், ஆனால் தான் சார்ந்திருக்கும் இயக்கங்கள், ஜமாஅத்துகள் மற்றும்  அமைப்புகளை திருப்தி படுத்த பெருநாளையே மாற்றிக் கொள்வார்களாம். எதைப்பற்றி உமக்கு ஞானமில்லையோ அதைச் செய்யத் தொடரவேண்டாம் (17:36) போன்ற இறைவசனங்கள் குறித்து இன்று யார்தான் கவலை படுகிறார்கள்? இதை சுட்டிக்காட்டுவது அவர்களை இழிவுபடுத்துவதற்காக அல்ல.

மாறாக நம் சமுதாயத்தில் அறிஞர்களாக அடையாளம் காட்டப்பட்டவர்கள் பிறை விஷயத்தில் சரியான அக்கரை எடுத்துக் கொள்ளாததும், தன் சுய கருத்தை நிலைநாட்டுவதை விட்டுவிட்டு, விருப்பு வெறுப்பின்றி குர்ஆன் சுன்னாவின் அடிப்படையில் பிறை விஷயத்தை ஆய்வு செய்யாததன் விளைவுதான் என்பதை அறியத்தருகிறோம்.

இத்தகையவர்கள் பிறைவிஷயத்தில் தங்கள் தற்பெருமையும், சுயகருத்துக்களை திணிப்பதையும் விட்டுவிட்டு, அல்லாஹ்விற்காக திறந்த உள்ளத்தோடு அக்கரை எடுத்து உளத்தூய்மையான முறையில் ஆய்வுசெய்து சிந்திப்பதே நம் சமுதாயத்திற்கு மிகவும் பயன் உள்ளதாக அமையும். அத்தகைய நல்ல சூழலை வல்ல அல்லாஹ் விரைவில் ஏற்படுத்துவானாக!

இவண்:

ஹிஜ்ரி கமிட்டி,

160/101, வடக்கு மெயின் ரோடு, ஏர்வாடி - 627103, தமிழ்நாடு.

 

 

 Mobile Contacts:

 

 

 

+9199626 22000, +9199626 33000, +9199626 44000, +9199624 77000, +9199626 33844, +9195007 94544,
+9199943 44292, +9193440 96221, +9194439 55333, +9194432 55643, +9199524 14885, +9199408 11119

 

Websites:

www.mooncalendar.in, www.hijricalendar.comwww.hijracalendar.inwww.hijricommittee.in

Email:

இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்., இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

Google Group:

 இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

Read 1614 times